யுத்தத்தினால் பாதிக்கப்பட்டு இதுவரை காலமும் இயங்காமல் இருக்கும் வலி கிழக்குப் பிரதேசத்தில் அமைந்திருக்கும் வளலாய் அமெரிக்க மிஷன் பாடசாலையினை மீளவும் இயங்க வைப்பதற்கு நடவடிக்கை எடுப்பதாக வடமாகாண கல்வி அமைச்சர் தம்பிராசா குருகுலராஜா உறுதியளித்தார்.

வலி கிழக்கு வளலாய் மக்கள் 1990 ஆம் ஆண்டு யுத்தத்தினால் அங்கிருந்து இடம்பெயர்ந்தனர். அதனால் இயங்காமல் இருந்த இப்பாடசாலை தற்போது  பாதிப்படைந்து உள்ளதாகவும், அதனை மீண்டும் ஆரம்பிப்பதற்கு பாடசாலை கட்டிடத்தை கட்டித்தருமாறு வளலாய் கிராமிய சங்கம் வடமாகாணக் கல்வி அமைச்சர் தம்பிராசா குருகுலராஜாவிடம் கோரிக்கையொன்றை விடுத்திருந்தனர்.

இதற்குப் பதிலளிக்கும் கூட்டமொன்று நேற்று (13) வளலாய்ப் பகுதியில் நடைபெற்றது. இதன்போது கருத்துத் தெரிவிக்கையிலேயே கல்வி அமைச்சர் மேற்கண்டவாறு தெரிவித்தார். தொடர்ந்து அமைச்சர் அங்கு கருத்துக் கூறுகையில், மேற்படி பாடசாலையினை 2ஆம் தவணைக்கு முன்னராக தனியார் வீடொன்றில் ஆரம்பியுங்கள். வடமாகாண சபையில் தற்போது போதியளவு நிதியில்லை. அடுத்தவருடத் தொடக்கத்திற்கு முன்னர் இப்பாடசாலைக்கு கட்டிடம் அமைத்து தருவதற்கு நடவடிக்கை எடுப்பேன் என உறுதியளிக்கின்றேன் என்று அவர் மேலும் தெரிவித்தார்.

மேற்படி பாடசாலை 1882ஆம் ஆண்டு அமெரிக்க மிஷனரிமார்களால் தரம் 4 வகுப்பு தொடக்கம் கல்விப் பொதுத்தராதர சாதாரண தரம் வரையான வகுப்புக்கள் கொண்டதாக ஸ்தாபிக்கப்பட்டது. தொடர்ந்து நாட்டில் இடம்பெற்ற யுத்தம் காரணமாக 1990ஆம் ஆண்டு வலி கிழக்கின் வளலாய் கிராமமும் இராணுவத்தினருடைய உயர் பாதுகாப்பு வலயமாக மாற்றப்பட்டது.

இருந்தும் 2011ஆம் ஆண்டு இப்பிரதேசம் இராணுவத்தினரால் விடுவிக்கப்பட்டது. அச்சமயம் யாழ்.மாவட்ட அரசாங்க அதிபராகவிருந்த இமெல்டா சுகுமார் இப்பிரதேசங்களில் மீண்டும் மக்களை மீளக்குடியமர்த்தியிருந்தார். இருந்தும், கட்டிடங்கள் சேதமடைந்திருந்தமை யினாலும், வளங்கள் இல்லாமல் இருப்பதினாலும் குறித்த பாடசாலை இதுவரை காலமும் மீள இயங்கவில்லை. இப்பகுதியில் வசிக்கும் மாணவர்கள் அருகிலுள்ள இடைக்காடு மகா வித்தியாலயம், அச்சுவேலி மத்திய கல்லூரி ஆகிய பாடசாலைகளுக்குச் சென்றே தற்போது கல்வி கற்று வருகின்றமை குறிப்பிடத்தக்கது.

வளலாய் அக்கரை கிராமம் மீள்குடியேற்றத்திற்காக படையினரால் விடுவிப்பு வியாழன், 11 ஜூலை 2013 - 18:10

யாழ் மாவட்டத்தில் இராணுவத்தின் பயன்பாட்டில் இருந்த வளலாய் அக்கரை கிராமம் இன்று வியாழக் கிழமை (2013-07-11) பொது மக்களின் மீள்குடியேற்றத்திற்காக இராணுவத்தால் விடுவிக்கப்பட்டுள்ளது. இன்று காலை இந்த கிராமத்தை பொது மக்களிடம் ஒப்படைக்கும் நிகழ்வு நடைபெற்றுள்ளது. 1986 ஆம் ஆண்டு இக்கிராமத்தில் வாழ்ந்த மக்கள் யுத்தம் காரணமாக பல்வேறு இடங்களில் வசித்து வருகின்றனர். இதுவரை காலமும் இராணுவத்தின் பயன்பாட்டில் இருந்த இந்த கிராமத்தில் மக்களை மீள்குடியேற்றம் செய்வதற்கு படையினர் இன்று உத்தியோகபூர்வமாக வழங்கியுள்ளனர். இதில் முதற்கட்டமாக இக்கிராமத்தில் வாழ்ந்த 38 குடும்பங்களை மீள்குடியேற்றம் செய்வதற்கான நடவடிக்கை மேற்கொள்ளப்பட்டுள்ளதுடன் அம்மக்களுக்கு தேவையான அனைத்து வசதிகளும் பிரதேச செயலர் ஊடக வழங்க நடவடிக்கை எடுக்கப்பட்டுள்ளது. இன்றைய இந்த நிகழ்வில் பாரம்பரியகைத்தொழில்கள் மற்றும் சிறுகைத்தொழில் முயற்சி அபிவிருத்தி அமைச்சர் கே.என்.டக்ளஸ் தேவானந்தா, வடமாகாண ஆளுனர் ஜீ.ஏ.சந்திரசிறி, யாழ் பாதுகாப்பு படைகளின் கட்டளைத்தளபதி மேஜர் ஜெனரல் மகிந்த ஹத்துருசிங்க, ஆளுனரின் செயலாளர் இ.இளங்கோவன், யாழ் மாவட்ட உதிவிச் செயலர் சுதர்சன், கோப்பாய் பிரதேச செயலர் பிரதீபன் மற்றும் பிரதேச செயலக உத்தியோகஸ்தர்கள், இராணுவ உயரதிகாரிகள், பொதுமக்கள் எனப்பலரும் கலந்துகொண்டனர்.